Muhanga: Meya yaburiye abacukuzi bubaka amazu muri mine batabanje kubisabira uruhushya

Ubuyobozi bw’akarere ka Muhanga bwaburiye kompanyi zikora ubucukuzi bw’amabuye y’agaciro zikunda kubaka amazu aho zicukura zitabanje gusaba ibyangombwa byo kuyubaka bityo buzisaba kwikosora guhera ako kanya.

Uwo muburo ubuyobozi bw’akarere ka Muhanga bwawuhaye abakorera kompanyi z’abacukuzi b’amabuye y’agciro mu nama bakoranye n’ubuyobozi bw’aka karere taliki ya 16 Ukwakira 2026 ndetse bubabwira ko uzongera kubikora azahanwa hakurikijwe amategeko.

Meya Kayitare Jacqueline yagize ati: “ Uwahawe uruhushya rw’ubucukuzi, uruhushya rwo kubaka icyo ashaka kubaka muri concession narwo akwiye kurusaba”

Amazu abacukuzi bakunda kubaka muri mine arimo ibiro byabo, ububiko ndetse n’inzu z’abashinzwe umutekano wo muri mine.Hari kandi abubaka inganda zibafasha gutunganya amabuye y’agaciro.

Ibibazo abacukuzi babajije mu iriya nama byumvikanisha ko bo bari bazi ko uwo RMB yahaye uruhushya rwo gucukura amabuye y’agaciro aba yemerewe kubaka amazu yo gukoreramo muri mine atiriwe abisabira urundi ruhushya. Hari umucukuzi wabwiye ubuyobozi ko yubatse muri mine amazu y’ibyumba umunani yifashishije amatafari ahiye kandi atabifitiye uruhushya. Meya yahise amusaba kuzagaruka ku karere agasaba ibyangombwa.

Hari uwabajije niba n’inganda bubaka muri mine bakwiye kubanza kubisabira uruhushya , Meya amubwira ko ariko amategeko abiteganya.

Perezida w’asosisiyasiyo y’abakora ubucukuzi bw’amabuye y’agaciro mu Ntara y’amajyepfo Kanyarwanda Innocent yavuze ko amakosa yo kubaka amazu muri mine batabanje kubyakira uruhushya bayahuriyeho nk’abacukuzi bose bo mu karere ka Muhanga.

Yagize ati: “ Ayo makosa abacukuzi twese tuyahuriyeho, abenshi amazu twubaka ntabwo tuyasabira ibyangombwa”

Uyu muyobozi w’ihuriro ry’abacukuzi b’amabuye y’agaciro bo mu ntara y’amajyepfo yijeje ubuyobozi ko aya makuru ari buyageze kuri bagenzi be bose kandi bagiye kwikosora bakajya bubaka babanje gusaba ibyangombwa.

Bimwe mu bihano bihabwa uwubatse nta ruhushya harimo gicibwa amande bitewe n’icyo yubatse naho yacyubatse ndetse no gusenya ibyo yubatse.

Mu karere ka Muhanga hakorera kompanyi 15 z'ubucukuzi bw'amabuye y'agaciro Zimwe muri zo ntabwo zitabiriye iyi nama nubwo n'izitabiriye inyinshi zatumye abakozi, abashoramari bazishinzehabonetse bake.