BNR yibukije ko inoti ya 5000Frw yakozwe muri 2014 itakuwe ku isoko

Nyuma y'uko hakomeje kugaragara abaturage binubira ko bari kujya guhaha bitwaje inoti za 5000Frw zakozwe muri 2014 abacuruzi bakazanga, Banki nkuru y'u Rwanda(BNR) yongeye kwibutsa ko iriya noti itari mu zigiye gukurwa ku isoko.

Mu mpera z'Ukwakira 2026 hari kugaragaye ikibazo cy'abinubira ko bamwe mu bacuruzi bari kwanga inoti ya 5000Frw yakozwe muri 2014 bayitiranya n'izo Banki nkuru y'u Rwanda yatangaje ko zizaba zitagifite agaciro nyuma y'amezi 12 uhereye Taliki 02 Werurwe 2026.

Mu itangazo BNR yasohoye Taliki 24 Werurwe 2026, rivuga ko inoti zizaba zitagifite agaciro ari:

*Iya 500 Frw yakozwe Taliki 01 Nyakanga 2004 ndetse n'iyakozwe Taliki 01 Mutarama 2013

* Inoti ya 1000Frw yakozwe Taliki ya 01 Nyakanga 2004 na ngenzi yayo ya Taliki ya 01 Gicurasi 2015.

* Inoti ya 2000Frw yakozwe Taliki 31 Ukwakira 2007

* Inoti ya 5000Frw yakozwe Tali 01 Mata 2004 ndetse n'iyakozwe Taliki 01 Gashyantare 2009.

Icyo gihe BNR yatangaje ko abafite izo noti zimaze kuvugwa bashishikarizwa kwihutira kuzihinduza ku bigo by'imari bibegereye mu gihe cy'amezi icyenda, abarwa uhereye Taliki 02 Werurwe 2026 kugeza 01 Ugushyingo 2026.

BNR kandi yatangaje ko nyuma y'iriya Taliki, ziriya noti zizahindurirwa gusa ku cyicaro gikuru cyayo kiri mu Kiyovu i Kigali ndetse no mu mashami yayo yose kugeza Taliki 1 Werurwe 2027.

Nubwo BNR imaze igihe itanze itangazo risobanutse ariko hari abacuruzi basa nabatarigeze baryumva kuburyo bari kwitiranya inoti zigiye guta agaciro.

Ukoresha imbuga nkoranyambaga ku mazina ya SHISHOZA@Kaliclau1 yandikiye BNR kuri X agira ati: "Mwiriwe neza

@CentralBankRw

Inoti ya 5000f yakozwe 2014 yaba iri mu zavanywe ku isoko??? Can you imagine, ukuntu umukozi agarutse ngo guhaha byanze?

Mumare impungenge rwose"

Iki kibazo BNR yahise igiheraho yibutsa ko inoti ya 5000Frw yakozwe muri 2014 itakuwe ku isoko ndetse inagaragaza inoti zose zitari ku rutonde rw'izigiye guta agaciro.

BNR yagize iti: "Muraho neza @Kaliclau1, inoti zizasigara zikoreshwa ku isoko ni izi zikurikira:

- 500 FRW yakozwe ku wa 01.02.2019

-1000 FRW yakozwe ku wa 01.02.2019

-2000 FRW yakozwe ku wa 01.12.2014 n’iyakozwe ku wa 28.06.2024

-5000 FRW yakozwe ku wa 01.12.2014 n’iyakozwe ku wa 28.06.2024."

BNR kandi yavuze ko ikomeje ubukanguramba ibinyujije kuri radiyo n'amatagangazo, igamije kwibutsa no ku kemenyesha ko hari inoti zigiye gukurwa ku isoko ndetse no kubafasha kumenya aho bashobora kuzihindurira.