Kuri uyu wa 25 kanama 2026, urukiko rwibanze rwa Kicukiro rwaburanishije urubanza ku ifunga n'ifungurwa by'agateganyo abantu 16 muri 80 barimo abakekwaho gukora inzoga zitujuje ubuziranenge zizwi nk’ibyuma barimo Ntihanabayo Samuel nyir’uruganda Ingufu Gin rukora ibinyobwa bisembuye.
Abaregwa bose barimo n'abitabiriye iburanisha ry'uyu munsi bakurikiranyweho ibyaha bifitanye isano no gukora, gucuruza, gukwirakwiza cyangwa kwinjiza mu gihugu ibinyobwa bitujuje ubuziranenge cyangwa bishobora kwangiza.
Iburanisha rya none ku ifunga n'ifungurwa ry'agateganyo ryitabiriwe n'abantu 16 bari mu byiciro birimo icy'abakozi b'ikigo cy 'igihugu gishinzwe ubuziranenge bw'ibiribwa n'imiti(FDA) n'abarimo abari bafite inganda zatunganyaga byinshi mu binyobwa bizwi nk'ibyuma byahagaritswe.
Ahagana saa yine z’igitondo ni bwo umucamanza yamenyesheje ababuranyi ko urubanza rutangiye ndetse asobanura ko bazajya baburana mu byiciro bari hagati ya batatu na bane.
Ntihanabayo Samuel Nyiri INGUFU GIN, Twahirwa Fulgence ushinzwe ubuziranenge muri Ingufu Gin na Katushabe Donias Donias ushinzwe umusaruro(Production) muri urwo ruganda ni bo babimburiye abandi mu kuburana.
Ubushinjacyaha bwavuze ko nyuma y’uko inzego zibifitiye ububasha zitangiye ubugenzuzi kugira ngo hamenyekane uko imikorere y’inzoga ikomeje gutera ibibazo mu Banyarwanda, byagaragaye ko inganda zirimo na Ingufu Gin LTD zirengagije nkana amabwiriza y'ubuziranenge.
Bwagaragaje ko mu mpamvu buvuga ko Ntihanabayo akwiriye gufungwa iminsi 30 y’agateganyo harimo iy’uko yirengagije amabwiriza y’ubuziranenge, agakora ibinyobwa bitabwujuje, ibyakuruye ingaruka mbi ku baturage.
Ubushinjacyaha bwavuze ko isuzuma rikorwa kugira ngo hasuzumwe niba ibiri mu binyobwa inganda zikora bidashobora guhumanya ubuzima bw’ababinywa ariko ko ibyo bitakozwe muri Ingufi Gin.
Umushinjacyaha yagize ati “Iyo iryo suzuma ridakorwa bihoraho Kandi rya hato na hato bishobora kugira ingaruka mbi ku buzima bw'abakoresha ibyo binyobwa mu gihe kirekire zirimo na Kanseri(Cancer)".
Indi mpamvu ikomeye yagaragajwe n’ubushinjacyaha nuko ngo ubuyobozi bwa Ingufu Gin bwabuze inyandiko igaragaza ko ibigega bibikwamo n'ibikorerwamo ibinyobwa muri urwo ruganda bikorerwa isuku n’isukura.
Bwanavuze ko muri Ingufu Gin batabika"Ethanol" mu buryo bukwiriye cyane ko ngo iperereza ryasanze ibikwa ahatagenzurirwa ubushyuhe ibishobora gutera ibibazo.
Bwasobanuye ko ibi bishobora gutuma ubukana bw’iyi ethanol bwiyongera cyane, bukagera ku kigero cya 94% nk'icyiyasanzwe muri urwo ruganda ndetse bikaba byagira ingaruka ku buziranenge bw’ibicuruzwa utaretse no gutera inkongi.
Ubushinjacyaha bwasobanuye ko indi mpamvu Ntihanabayo akwiriye gufungwa iminsi 30 y’agateganyo ari uko iperereza ryagaragaje ko muri uru ruganda babika mu buryo budakwiriye ibikoresho byifashishwa mu gutanga uburyohe, impumuro n’ibara mu binyobwa, (Flavours).
Ubushinjacyaha bwerekanye ko izo Flavours zakoreshwaga mu binyobwa bisembuye byo mu ruganda rwa Ingufu Gin bitagaragazwa aho zaturutse ibyagaragajwe nk'uburiganya.
Bwanerekanye Kandi ko kandi iri perereza ryasanze imifuniko ikoreshwa mu gufundikira inzoga yari yararengeje igihe cyagenwe cyo kuyikoresha, ibi ngo bikaba bishobora kugira ingaruka mbi ku buzima bw'abazinywa.
Ntihanabayo yahawe umwanya ngo yiregure abwira urukiko ko ari umushoramari, ko we icyo yakoze nyuma yo gushinga uruganda ari ugushyiraho inzego zitandukanye mu ruganda zishinzwe gukurikirana ko ibirukorerwamo byujuje ubuziranenge.
Yavuze ko niba haragaraye amakosa, akwiriye kubazwa abari babishinzwe kuko ni bo bari bafite ububasha bwo kubigenzura.
Umucamanza yahise amubaza ko kuba ari umushoramari ndetse akaba afite n’abakozi bashinzwe gukurikirana iby’ubuziranenge bakurikiranweho we bitamureba.
Ati “Ubwo bishatse kuvuga ko sosiyete yawe itandukanye nawe ku giti cyawe?”
Yakomeje abwira Ntihanabayo ko Ubushinjacyaha bugaragaza ko na we yabigizemo uruhare nubwo we avuga ko hari hari abakozi bashinzwe gukurikirana ubuziranenge bw’ibicuruzwa uruganda rushyira ku isoko.
Ntihanabayo yasubije asaba urukiko ko bakomeza kumukirirana ariko agakurikiranwa ari hanze kuko adateganya kwica iperereza cyangwa kuribangamira.
Umwe mu banyamategeko babiri bunganiye Ntihanabayo yavuze ko atemeranya n’impamvu ubushinjacyaha bwatanze y’uko iperereza ryasanze imifuniko yifashishwa mu gufpundikira ibinyobwa muri urwo ruganda yararangije igihe cyagenwe.
Agaragaza ko mu busanzwe inzoga zo mu bwoko bwa Likeri ‘Liqueur’ zitajya zirangiza igihe bityo ko badakwiriye kuvuga ko imifuniko yarangiye igihe cyo gukoreshwa.
Uyu munyamategeko yavuze ko umukiliya we akwiriye gukurikiranwa ari hanze kuko hari ibindi bikorwa bitandukanye yari yarashoyemo imari birimo ishuri ndetse n’umushinga wo kubaka isoko rya Biryogo, bishobora gukomwa mu nkokora no kuba afunzwe ndetse avuga ko mu gihe hakenerwa n'ingwate yatangwa.
Inkuru igaragaza ko abandi baburanye ni mukanya
Ibitecyerezo (0)
Andika igitecyerezo cyawe hano hasi: